930 fëmijë në mbarë vendin janë të prekur nga koronavirusi. Shifrat për “Alsat” i konfirmon drejtori i Institutit të Shëndetit Publik Shaban Memeti. Klinika e Fëmijëve tashmë është shndërruar në Qendër Kovid, ku për momentin të shtrirë janë 21 fëmijë pozitiv të moshës nga 1 muaj e gjysmë deri në 18 vjeç. Vetëm mbrëmë janë pranuar dhjetë fëmijë me Kovid. Drejtoresha e kësaj Klinike bën thirrje që fëmijët të mos grupohen nëpër ambiente të mbyllura.
“Gjendja nuk është siç ishte më herët. Kur thuhej se fëmijët janë asimptomatik dhe se më lehtë e kalojnë virusin, tanimë kjo gjë nuk është kështu, çështja ka ndryshuar. Për momentin kemi 21 fëmijë, ndërkohë lëshojmë për në shtëpi në bazë ditore por 10 fëmijë kemi pranuar mbrëmjen e djeshme. Kryesisht tek fëmijët simptomat janë temperaturë e lartë, ndezje, mungesë oreksi për ushqim e cila mund të sjellë deri në dehidrim që është mjaft fatale tek fëmijët”, tha Aspazija Sofijanova, drejtore e Klinikës së Fëmijëve në Shkup.
About Author
