Spektatorët e huaj nuk do të lejohen të hyjnë në Japoni për Lojërat Olimpike të kësaj vere mes shqetësimeve për koronavirusin, thanë organizatorët të shtunën.
Rreth 600,000 bileta olimpike të blera nga persona me shtetësi të huaj do të rimbursohen, po ashtu edhe 300,000 bileta të tjera të Lojërave Paraolimpike, tha në një konferencë për shtyp Toshiro Muto, shefi ekzekutiv i komitetit organizues Tokyo 2020.
Lojërat Olimpike u shtynë vitin e kaluar për shkak të pandemisë COVID-19. Megjithëse pandemia e ka ftohur publikun ndaj kësaj veprimtarie të rëndësishme sportive, si organizatorët ashtu edhe Kryeministri Yoshihide Suga janë zotuar të mos i ndryshojnë planet për zhvillimin e Lojërave.
Vendimi për spektatorët e huaj do të “garantojë Lojëra të sigurta për të gjithë pjesëmarrësit dhe publikun japonez”, thanë organizatorët e lojërave Tokyo 2020 në një deklaratë pas bisedimeve pesë-palëshe që përfshinin kreun e Komitetit Olimpik Ndërkombëtar, Thomas Bach dhe guvernatorin e Tokios.
“Njerëzit që janë të përfshirë në Olimpiadë mund të lejohen të hyjnë në vend, ndërsa vizitorët e rregullt nuk do të jenë në gjendje ta bëjnë këtë,” tha zoti Muto.
Ai tha se kostot për anulimet e hoteleve nuk do të mbulohen. Organizatorët do të shikojnë gjithashtu mundësinë për zvogëlimin e numrit të anëtarëve të stafit që do të marrin pjesë në Lojëra.
Lojërat janë planifikuar për periudhën 23 korrik deri më 8 gusht, dhe paraolimpiadat nga 24 gusht deri më 5 shtator.
About Author
