Alan Gregori është tifozi anglez i skuadrës së Midëlsbrug, e cila aktualisht militon në divizionin e dytë anglez. Ajo çka e bën të veçantë këtë fans është fakti se ai mban një rekord të pabesueshëm prej 1000 ndeshjeve rresht të ndjekura në shtëpi. Alan nuk ka munguar në një ndeshje që skuadra e tij ka zhvilluar në shtëpi që nga viti i largët 1983.
Alan e ka festuar këtë arritje të jashtëzakonshme në ndeshjen e kësaj jave ku Midëlsbrug u përball në shtëpi me Hudërsfilld Taun, ndeshje e përfunduar me rezultatin 0-2 në favor të skuadrës mike.
Pavarësisht humbjes kjo ndeshje shënon prezencën e 1000-të rresht për Alanin në stadium.
Në përfundim të ndeshjes tifozi anglez, i cili u bë i famshëm në media për shkak të kësaj arritje u shpreh:
“Janë 40 vite që nuk humbas një ndeshje të skuadrës time në shtëpi, më vjen keq për gruan time Xhein.
Kam humbur disa martesa dhe evenimente familjare ndër vite, kam treguar kujdes dhe në planifikimin e pushimeve në mënyrë që të isha gjithmonë i pranishëm.
Sa më shumë ky rekord i imi zgjaste aq më shumë doja ta vazhdoja.”, u shpreh Alan.
About Author
