Deklaratat e sotme të ministrit të Shëndetësisë Venko Filipçe për Qendrën e re Klinike në Shkup kanë ngjallur reagime te kreu i VMRO-DPMNE-së opozitare, Hristijan Mickoski.
Ai në Facebook ka shpërndarë deklaratat e ministrit Filipçe me mbishkrimin ku ministrin e quan palaço të kryeministrit Zoran Zaev.
“Nga një kirurg i shkëlqyeshëm, një ministër premtues, të përfundosh si një palaço i Zoran Zaevit është një humbje e madhe personale … ah koleg koleg, një këshillë, dinjiteti nuk ka çmim!”, ka shkruar Mickoski.
Ndryshe, ministri i Shëndetësisë, Venko Filipçe sot tha se shpreson se për projektin e ndërtimit të Qendrës së re Klinike në komunën e Gjorçe Petrovit do të gjejnë zgjidhje me VMRO-DPMNE-në, transmeton Alsat.
Ai i shpalosi të gjitha aktivitete e ndërmarra për ndërtimin e kësaj qendre gjatë periudhës së shkuar.
Sipas vendimit të fundit Qendra e re Klinike do të financohet nga buxheti. Dallimet mes pushtetit dhe opozitës janë kryesisht në vlerën e projektit dhe harxhimet e parapara në studimin e fizibilitetit.
About Author
