Në prani të një numri të konsiderueshëm të dashamirëve të kulturës, në mjediset e kompleksit “Panorama” – Rashtishë, të mërkurën mbrëma, më 28 korrik 2021, është bërë përurimi i librit “Pa idealizime” të autorit të ndjerë Islam Pali. Për librin dhe figurën e gazetarit Islam Pali, i cili në libër paraqitet edhe si përkthyes, kritik letrar dhe poet, kanë folur redaktori i librit dhe kolegu i tij shumëvjeçar në Radion e Malit të Zi, gazetari dhe shkrimtari Fran Camaj, gazetari Ali Salaj, si dhe gazetarët Sabri Halili dhe Ismet Kallaba, të cilët e kanë përgatitur librin. Gjatë përurimit nxënësi Behar Pali ka recituar disa poezi nga libri dhe është lexuar një fragment nga libri, ndërsa në emër të familjes të pranishmit i ka përshëndetur djali i autorit, Lan Pali. Libri “Pa idealizime” është përmbledhje e artikujve gazetareskë të gjinive të ndryshme, recensioneve dhe përkthimeve letrare, punimeve në fushën e toponomastikës etj., që janë botuar në revistat “Koha”, “Fati”, “Koha javore”, “Lemba” apo emetuar në Radion e Malit të Zi. Po ashtu, pjesë e librit janë edhe disa poezi të autorit, që botohen për të parën herë.Përurimi i librit është organizuar nga Shoqata e Artistëve dhe Intelektualëve “Art Club” në bashkëpunim me familjen e autorit.
About Author
