Kombëtarja shqiptare e futbollit ka përfunduar edhe ditën e tretë dhe të fundit të seancave stërvitore në ambientet e ‘Shtëpisë së Futbollit’ në Tiranë.
Dita e tretë ishte me surpriza të pakëndshme, pasi mbrojtësi Ardjan Ismajli mungoi në seancën stërvitore për shkak të një dëmtimi të pësuar një ditë më parë dhe rrezikon shumë prezencën e tij në sfidën ndaj ‘Tre Luanëve’ të Britanisë. Ndërkohë, ka një balotazh mes Ajetit dhe Kumbullës për një vend titullari, me Kumbullën në disavantazh, pasi dje ai u stërvit vetëm në palestër.
Pjesa tjetër e grupit mori ngarkesë të plotë dhe Silvinjo ka mundësi zgjedhjeje për formacionin, që pritet të ketë ndryshime në të tre repartet krahasuar me ndeshjet e ‘Ligës së Kombeve’ dhe atij të Evropianit të kaluar.
Pasditen e kësaj të mërkure, Shqiponjat kuqezi do të udhëtojnë drejt Londrës, pasi stafi teknik ka kërkuar që ky udhëtim të bëhet dy ditë përpara ndeshjes, në mënyrë që lojtarët të kenë mundësi të pushojnë. Ditën e nesërme do të zhvillohet edhe seanca zyrtare stërvitore në Uembli, si dhe konferenca për shtyp e trajnerit të Kombëtares, Silvinjo, përpara se të nisë misioni ‘Amerik 2026’. /SYRI TV/
About Author
