Shaban Sinani
Kryetari i Federatës së Futbollit të Maqedonisë, Masar Omeragiq, në “Shtëpinë e Futbollit” ka zhvilluar takim me ministrin e sportit Borko Ristovski.
Fokusi kryesor i bisedës mes presidentit të FFM-së dhe ministrit të Sportit është iniciativa e të dyja institucioneve që synon zhvillimin e futbollit dhe sportit në përgjithësi.
Diskutimi, ku mori pjesë edhe Sekretari i Përgjithshëm i FFM-së, Drilon Ganiu, u fokusua në ndarjen e mjeteve nga buxheti i shtetit për sportin, përmirësimin e infrastrukturës, investimet në programet bazë dhe garat kombëtare.
Ministri i Sportit, Borko Ristovski, konfirmoi përkushtimin për financimin e futbollit dhe dërgoi mesazh për partneritet me FFM-në dhe përkrahje për iniciativat e Federatës, duke theksuar se zhvillimi i futbollit është në harmoni me politikat sportive kombëtare.
U diskutuan planet për përmirësimin e infrastrukturës së stadiumeve, përmirësimin e qendrave stërvitore dhe mbështetjen e ekipeve të të rinjve.
Si ministri ashtu edhe presidenti i federatës theksuan rëndësinë e bashkëpunimit të fokusuar në interesin publik. Ata ranë dakord me propozimin për shpërndarje të barabartë të fondeve nga Ministria e Sportit për klubet që plotësojnë kërkesat për mbështetje shtetërore.
“Angazhimi ynë është të mbështesim Federatën”. “Futbolli është interes publik dhe ne duhet të ndihmojmë duke siguruar drejtësi dhe rritje në të gjitha nivelet”, theksoi ministri Ristovski.
“Ne jemi njerëz të sportit dhe jemi vërtet të kënaqur që së bashku me Ministrinë e Sportit po fillojmë një nivel të ri bashkëpunimi, profesionalizëm dhe transparentë. Vlerësojmë mbështetjen e qeverisë për krijimin e kushteve për zhvillimin e sportit. Një nga gjërat kyçe për të cilat kemi rënë dakord është ndarja e mjeteve nga Ministria e Sportit për klubet. Trajtimi i barabartë për të gjithë është prioriteti ynë dhe ne do ta realizojmë atë. Ne kemi një vizion të qartë për të investuar në futboll dhe sport në përgjithësi, dhe kur ke një partner që i di saktësisht nevojat, atëherë është shumë më e lehtë”, tha presidenti i FFM-së, Masar Omeragić.
Në takim u diskutua edhe për ndeshjet e ligës vendase, tërheqjen e investimeve dhe përmirësimin e cilësisë së përgjithshme të futbollit në vend. Marrëdhëniet mes pushtetit lokal, klubeve dhe Ministrisë së Sporteve është kyçe për rritjen e garave dhe përmirësimin e infrastrukturës.
About Author
