Tre kandidatë janë në garën për rektor të Universitetit të Tetovës i cili sot është në ditën e tij të fundit të pranimit të ndonjë emri të ri të mundshëm përmes postës. Më tej, organet e universitetit, konkretisht komisioni që ka për synim zgjedhjen e titullarit, do të shqyrtojë emrat dhe do të vendosë për njërin prej tyre, si personi që do të drejtojë dhe menaxhojë këtë institucion të lartë arsimor. Nga ajo që mëson Alsat, deri tani kanë konkurruar Jusuf Zejneli, dekani aktual i Fakultetit të Drejtësisë, Myqereme Rusi, profesore në Fakultetin Filozofik, si dhe Bashkim Ziberi, profesor nga Fakulteti i Shkencave Matematiko-Natyrore.
Siç mëson ALSAT, ushtruesi i detyrës Kushtrim Ahmeti nuk ka konkurruar në këtë pozitë, pasi sipas informacioneve jozyrtare, pengohet nga titulli profesor ordinar i marrë në një shtet tjetër, ende jo pjesë e qarkullimit juridik në kuadër të njohjes së tij. Kandidatët e rinj kanë një prapavijë që bie në sy. Zejneli është i njohur për opinionin publik për lidhjet politike me BDI-në, fillimisht shef kabineti i ish sekretarit të përgjithshëm të BDI-së Gëzim Ostreni, vazhda e të cilit duket qartë edhe nga pjesëmarrja në ahengjet masive me kreun e partisë Ahmeti dhe zyrtarë të tjerë të BDI-së, të dalë ose të angazhuar aktualisht në Universitetin e Tetovës.
Bashkim Ziberi duket se ka konkurruar pas heqjes së pengesës së theksuar në konkursin e fundit, ku njëra prej pikave diskriminuese ndalonte konkurrimin e të gjithë atyre që kishin dhënë më herët dorëheqje nga ky institucion.
Myqereme Rusi njihet si një nga themelueset e Universitetit, në ballë të protestave me lëvizjen e grave në vitet ‘90 dhe fillim vitet 2000.
Garën e ka braktisur ushtruesi i detyrës Kushtrim Ahmeti, ndaj të cilit, rëndonte edhe akuza nga inspektorati arsimor, për caktimin e tij në këtë detyrë, pa ofruar dëshmi si profesor i rregullt. Universiteti i Tetovës e anuloi konkursin e tij të parë, pas hedhjes dritë nga televizioni ALSAT të disa problemeve me shkeljen e ligjit për arsim të lartë dhe statutit të vetë universitetit, duke vendosur kriteret diskriminuese, se kandidatët duhet të kenë 15 vjet përvojë dhe se nuk duhet të kishin dhënë më parë dorëheqjen nga ky institucion. Këto shkelje u konstatuan edhe nga Inspektorati i Arsimit, pavarësisht se Universiteti këmbëngulte t’i hidhte hi syve opinionit publik për rregullsinë e procesit. Arsyetimi i anulimit të konkursit, ishte se palë të treta kanë lëkundur integritetin institucional të universitetit. Prej ditësh ALSAT kërkon llogari edhe nga Ministria e Arsimit për marrjen e masave ndaj shkeljeve, por deri tani, ministri Jeton Shaqiri arsyetohet me zinxhirin shumë të gjatë të procedurave, deri në vërtetimin e tyre dhe masat finale për shkeljet. /Alsat.mk
About Author
