Të nderuar qytetarë të komunës së Tearcës, Lëvizje BESA reagon në lidhje me Raportin për realizimin e Programit për punë të Komunës së Tearcës për vitin 2022 si dhe dëshirojmë të njoftojmë opinionin e gjërë me përmbajtjen e këtij Raporti. Ky Raport i cili i propozua nga Kryetari i Komunës së Tearcës dhe u miratua nga Këshilli Komunal është skandaloz, i papranueshëm dhe nuk paraqet realititetin se cilët punë janë kryer ose nuk janë kryer në Komunën e Tearcës.
Komunën e Tearcës një kohë të gjatë e udhëheqin kuadro të BDI-së, mirëpo problemet me të cilat ballafaqohen qytetarët janë të mëdha dhe shumica e tyre kanë të bëjnë me nevojat elementare për jetesë. Edhe kryetari i ri si duket vazhdon me avazin e paraardhësit të tij, dhe si duket edhe raportin për punët e kryera nga viti në vit e bëjnë copy paste dhe vetëm vitin e ndryshojnë.
Në mungesë të realizimit të projekteve, me këtë raport për realizimin e programit për punë për vitin 2022 vërehet qartë tendenca e kryetarit të Komunës për të përvetësuar edhe punët të cilët i kanë realizuar qytetarët e vendbanimeve të komunës së Tearcës me vetëiniciativë dhe me vetëkontribut. Disa nga vendbanimet e komunës së Tearcës fare as që përmenden në raport, dhe në ato vendbanime tjera që përmenden, disa punë të cilat paraqiten se janë të kryera të njejtat në përshkrimin që u bëhet në raport hiperbolizohen si projekte të mëdha kurse në fakt janë disa punë të vogla si psh. Vendosja e një gypi prej 30 m paraqitet si ndërtimi i kanalit për ujra atmosferik, ose vendosja e 30 m2 bekatonave paraqitet si Rekostruim i qendrës së fshatit, ose lyerja e disa mureve nga ana e rinistëve të fshatit paraqitet si Rekonstruim i Parkut e kështu me radhë.
Në raport qëndrojnë edhe gjëra tjera të cilat nuk kanë të bëjnë me realitetin, përmenden se janë rekonstruktuar rrugë, se janë përkujdesur për mirmbajtjen e fushave të sportit, për ndriçimin publik etj, por realiteti i dhimbshëm është se Komuna e Tearcës nuk ka realizuar asnjë projekt kapital me të cilën do të përmisoheshte jeta e qytetarëve tanë. Që të jetë ironia edhe më e madhe, Kryetari i Komunës së Tearcës ka ca kohë që lavdërohet për zgjidhjen dhe të përmirësojë sistemën e mbledhjes dhe trajtimit të mbeturinave.
Megjithatë, kur flet për “zgjidhjen e problemit”, kjo nuk do shumë që të hulumtohet, kjo është shumë e qartë. Një nga hapat kryesorë që ai ka ndërmarrë është rritja e çmimit për shërbimin e mbledhjes së mbeturinave. Më parë, qytetarët paguanin 200 denarë në muaj për këtë shërbim, tani duhet të paguajnë 270 denarë. Ky është shërbimi i vetëm që ka arritur që të bëjë, jo për tua lehtësuar jetën qytetarëve, por t’ua bërë edhe më të vështirë situatën ekonomike edhe ashtu të rënduar. Nëse kryetari i komunës do të donte të tregonte se ka arritur vërtetë një zgjidhje, atëherë duhet të paraqiste argumente dhe fakte të tjera që tregojnë një përmirësim në cilësinë e shërbimit.
Andaj ne si Lëvizje BESA këto gjëra i konsiderojmë si gënjeshtra dhe të papranueshme. Këshilltarët e Lëvizjes BESA në seancën e kaluar në Këshillin të Komunës së Tearcës votoi KUNDËR këtij raporti. Lëvizja BESA edhe njëherë dëshmoi se është në krah të qytetarit dhe gjithnjë do të jetë në mbrojte të interesave të tyre.
About Author
